ساعات وساعات
ساعات وساعات
بقلم مصطفى سبتة
ماهوكله خلاص بقى عادى
و لو تفهم حتعمل ايه
بنبقى احــــنا مهوش احنا
تتــــــــــوه منا مــــلامحنا
وننسى فين مطارحـــــنا
ونبض القلب يبقى اهات
وضحكتنا تصير محنــه
ساعات وساعات فجأه
بنتغير بدون أســــــــــباب
نصير عن بعضنا أغــــراب
حكايه سخيفه جوه كتاب
فى لحظة الدنــــيا تتحول
تصير زنزانــه من غير باب
ساعات وساعات فجأه
بنعمل نفسنا عايشـــــين
بنرقص واحنا مش حاسين
نحقق حلم ناس تانيـين
نشوف الغدر فى عيونهم
ونعمل برضه مش شايفين
ساعات و ساعات فجأة
بنهرب حتى من روحنا
ندارى وجعنا و جروحنا
و لو بالدمع يوم بوحنا
نقول ابدا مفيش عادى
و نضحك بس على روحنا
و من كتر اللى انا شفته
فى رحلة عمرى و عرفته
بقت كل عندى الأمور عادى
سنين تيجى و سنين بتروح
و مش فارق سكات من بوح
و مين سجان و مين قاضى
و مين ظالم و مين مظلوم
و ليه تاخد من المحروم
و ليه تدى اللى مش راضى
و مين. سامع أنين روحك
و سادد ودنه عن بوحك
و حاضر بس فى الماضى
رواية سطورها متعاده
عسلها صبر ومر بزياده
و ضى قمرها ده رمادى
سطور تضحك بصوت عالى
سطور تبكى على حالى
كتاب مليان كلام فاضى
و مش فارق حتفهم ايه
و لو تفهم حتعمل ايه
ماهو كله خلاص بقى عادى
ليست هناك تعليقات:
إرسال تعليق