يا أيامنا اللي فارقتنا
يا أيامنا اللي فارقتنا
بقلم : محاسن مرضي السيد
يازمن الطيبة ودعناك
وودعنا البراءة معاك
وودعنا معاك كلمات
كانت بتربي فينا الخير
كانت أمي تقولي تملي كلمة عيب
علي اللي ما كانش يعجبها. .
كانت بتبص لينا البصة نفهمها
ولو حاجة ما هش عجباها. . بنسيبها
وآاه لو شعري بان م الطرحة وأنا خارجة
كانت بتقول. .خلاص خلصت
زمانهم قالوا مش لاقية. ..
لا أم تربي .. ولا أب تخاف منه
ولو طولت في الشباك. .
وقلت أبص يوم ع الناس
تقولي خلاص. .
زمان سيرتك .. على لسان الجيران لفت
وليهم حق يحكوا علينا ويغنوا. .
كانت أيام يا ريتها تعود. .
كان ابن الجار عليا يخاف. .
كأني أخته. .اللي من دمه ومن دمي
وأي كبير نقوله يا عمي. .
حتي لو ما هوش عمي
وكنا نصلي وقت بوقت. .ما فيش ولا ركعة بتفوتنا
ولو بالصدفة شفنا حاجة عجبتنا
عليها كنا بنسمي..
كانت لمتنا ع الطبلية بتشبعنا بزيادة
وباب دارنا ماهوش مقفول. .
وكان الحب مالي القلب بزيادة
ونعزم جارنا وجارتنا علي فطارنا
وأمي تقول .. يارب استرنا .. وما تقطعلناش. .عادة
يا زمن الطيبة ودعناك ونفسي تعود لنا تاني
يا أيامنا اللي فارقتنا
بجد بجد ... وحشاني
ما فيش ليه أمان في دنيتنا
ليه وخداكم ..ووخداني
دا لو قربنا للي خالقنا..
ورجعنا لأخلاقنا ...
ما فيش مخلوق هيسبقنا
ولا في حياتنا هنعاني. .
ليست هناك تعليقات:
إرسال تعليق